吳鎮宇 chok爆燈

重頭劇《衝上雲霄 II》終於出街，收視許勝不許敗，無綫响開播前連續搞咗兩次晒冷宣傳谷劇，首先係上個禮拜四（七月十一日），全人類著上整齊航空制服，响飛機維修庫開記者會，跟住星期日（十四日），男嘅西裝，女嘅低胸盛裝亮相，响酒店舉行酒會。

一向比林峯更加 chok嘅吳鎮宇，戴黑超扮飛機師駕輕就熟，反而除低副超著套老西出席酒會，視線無遮無擋下，竟然一腳就踩爆紅地氈旁邊盞燈。代唔代表收視爆燈都係其次，重點係衰咗嘅吳鎮宇，繼續氣定神閒 chok住影相。
堅持 chok到底，同記者一邊食嘢一邊傾偈，都要用手掩住個嘴，儀態好過香港小姐。至於對收視有咩期望，當日塊面搽咗成吋厚粉嘅鎮宇，就講到好冇所謂：「今次係最後一次宣傳，我要返大陸拍戲，如果結局收視好，有面嘅咪返嚟囉！」
據聞《衝 II》以大量床戲嘴戲甚至野戰做賣點，以上情節，以前都算係無綫嘅武器，但今時今日，睇怕要視乎班演員嘅運氣啦！

(繼續閱讀...)

You are receiving this email because you subscribed to this feed at blogtrottr.com.

If you no longer wish to receive these emails, you can unsubscribe from this feed, or manage all your subscriptions